کچھ ویڈیو کلپس

(اپڈیٹ کرنے میں خاصی دیر ہوگئی. )

میرے ساتھی طلبہ نے پچھلی پوسٹ پر کافی خدشات کا اظہار کیا کہ اگر یہ بات آگے تک پہنچ گئی تو استاد پر لکھنے کی وجہ سے معاملہ میرے تعلیمی مستقبل لیے خطرناک بھی ہوسکتا ہے۔ لہٰذا احتیاطی تدابیر کے طور پر میں وہ پوسٹ پوشیدہ کررہا ہوں۔ ویسے بھی جنہوں نے پڑھنا تھا، وہ پڑھ ہی چکے ہوں گے۔

14 اکتوبر 2009ء، سنیچر، ایک یادگار دن جب جامعہ کراچی کے آڈیو ویژول سینٹر میں نوجوانوں کی آواز ماہ نامہ ’’یوتھ ایکسپریس‘‘ کی تقریبِ اجرا منعقد ہوئی۔ تقریب کی نظامت (کمپیرئنگ) کے فرائض انجام دینے والوں میں ایک موصوف مابدولت بھی تھے۔

میگزین کے ایڈیٹر ان چیف مرزا نادر بیگ سے میرا تعارف بس اچانک ہی ہوا۔ گذشتہ ماہ میں نے جامعہ میں مختلف جگہ ایک اعلان چسپاں دیکھا کہ ماہ نامہ ’’یوتھ ایکسپریس‘‘ کا اجرا کیا جارہا ہے جس کے لیے تحاریر ارسال کی جاسکتی ہیں۔ میں نے ان کے دیے ہوئے ای۔میل پتے پر ربطہ کیا تو مرزا نادر بیگ کا حوصلہ افزا جواب آیا۔ میں نے اپنی ایک پرانی تحریر ’’انڈا‘‘ ارسال کی تو مرزا صاحب خاصے متاثر ہوئے۔ شروع میں کافی تکلفات ملحوظ رکھے کیوں کہ مجھے قطعی اندازہ نہیں تھا کہ اس میگزین کا جامعہ سے کوئی تعلق ہے۔ پھر جب نادر سے پہلی ملاقات ہوئی تو بالکل ہی الٹ ماجرا تھا۔ یہ صاحب تو مجھ سے بھی آٹھ/ نو ماہ چھوٹے نکلے۔ شعبۂِ سیاسیات (پولیٹکل سائنس) کے دوسرے سال میں زیرِ تعلیم۔ نادر کے توسط سے باقی دوستوں سے بھی شناسائی ہوئی۔ سلیم انصاری، شاہ ولی، عباد، احسن، طلحہ، جبران، ماہین علی وغیرہ۔۔۔ نادر نے میگزین کی تکمیل کے تمام مراحل میں سب کو ساتھ رکھنے کی کوشش کی اور آخر ہم ایک اچھی ابتدا کرنے میں کامیاب ہوئے الحمدللہ۔

مرزا نادر بیگ

تقریبِ اجرا کے اختتام پر یوتھ ایکسپریس ٹیم

تقریب کے شرکا

میگزین کی تقریبِ رونمائی

مرزا نادر بیگ کو اظہارِ خیال کی دعوت دیتے ہوئے

شخصیت نگاری کی تاریخ نئی نہیں ہے۔ البتہ زمانۂ قدیم میں یہ فن صرف بادشاہوں، نوابوں، راجاؤں یا مذہبی شخصیات کے حالاتِ زندگی لکھنے تک محدود تھا۔ یہ حالاتِ زندگی سوانحِ عمری کی صورت رقم کیے جاتے اور ان میں کئی جگہ لکھنے والے کی جانب داری نمایاں ہوتی کیوں کہ ایسی تحاریر عموماً کسی خاص مقصد کے تحت لکھی جاتیں یعنی مصنف کا مطمحِ نظر کسی شخصیت سے عقیدت یا لگاؤ کے سبب اسے بڑھا چڑھا کر بیان کرنا یا رنجش و عداوت کے سبب اس پر الزام تراشی اور اس کی کردار کُشی کرنا ہوتا تھا۔ ایسی سوانحِ عمریوں کے مقابلے میں بہرحال خاکہ نگاری ایک نئی صنف ہے۔

ڈاکٹر جمیل جالبی (پ۱۹۲۹ء) لکھتے ہیں:
اردو ادب میں خاکہ، مختصر افسانہ کی طرح، ایک نئی صنف ہے۔ اس سے پہلے ہمیں طویل سوانح عمریاں تو ملتی ہیں لیکن اُن کی حیثیت عام طور پر ادبی کم اور تاریخی زیادہ ہے۔غاؔلب کے فوراً بعد کے دور میں سوانح نگاری نے ایک خاص اہمیت حاصل کرلی اور حاؔلی کی یادگارِ غالب، حیاتِ سعدی، حیاتِ جاوید، شبلیؔ کی حیاتِ ابوحنیفہ، المامون اور الفاروق وغیرہ سامنے آئیں۔ یہ چیزیں مستقل تصانیف ہیں اور ان میں کسی ایک شخصیت کے مختلف پہلوؤں کو ہر زاویۂ نظر سے دیکھا اور دکھایا گیا ہے۔ ان میں تاریخی اہمیت زیادہ اور کردار نگاری کا عنصر کم ہے۔

مرزا فرحت اللہ بیگ ۱۵؍اگست ۱۸۸۵ء میں دہلی میں پیدا ہوئے۔ والد کا نام حشمت بیگ تھا۔ ان کے آبا و اجداد شاہ عالم ثانی کے دورِ حکومت میں ۱۸ویں صدی کے آخر میں ہجرت کرکے دہلی پہنچے اور فوج کی ملازمت اختیار کی۔ فرحت نے ابتدا میں مرزا الم نشرح کے قلمی نام سے لکھا۔ عظمت اللہ خاں ان کی تحریروں کی تعریف کرتے اور زور دیتے کہ کوئی زوردار مضمون لکھیے۔ اسی اصرار کے نتیجے میں فرحت اللہ نے مولوی نذیر احمد پر اپنا معرکہ آرا خاکہ لکھا جو کہ آپ کے اصل نام سے چھپا۔ اس مضمون سے اُردو دنیا میں اُن کی دھوم مچ گئی اور وہ یکایک شہرت کی بلندیوں پر پہنچ گئے۔ فرحت اللہ بیگ نے ۱۹۴۷ء میں وفات پائی۔

خاکہ نگاری اور مرزا فرحت اللہ بیگ کی خاکہ نگاری کے حوالے سے میرا اسائنمنٹ آن.لائن پڑھیں.

اگلے دن میں تو صبح اپنے وقت پر جامعہ پہنچا کہ صبح اردو کی کلاس تھی۔ ابو سوا دس بجے کے قریب جامعہ پہنچ گئے۔ میں انہیں لے کر جمنازیم پہنچا۔ اویس نے ایک اسٹال کا بندوبست کردیا۔ ابو نے اپنا سارا سامان نکالا، خطاطی کے کچھ نمونے اور اپنی چند پینٹنگز بھی سامنے رکھیں۔ اسٹال یہ تھا کہ آپ اپنا نام خوبصورت انداز میں لکھوائیں، فی نام 20روپے۔ شروع میں تو ایسا لگا جیسے لوگ اس طرف توجہ نہ دیں گے لیکن علی نے کافی ساتھ دیا (حالانکہ ویسے اس سے اتنی زیادہ بنتی نہیں)۔ آدھ/ ایک گھنٹا وہیں کھڑا رہا اور لوگوں کو آواز دے دے کر اس طرف متوجہ کرتا رہا۔ کسی قسم کی کوئی پریشانی نہیں ہونے دی۔ بعد میں تو پھر ایسا رش لگا کہ ابو کو پانی پینے کا بھی مشکل سے وقت ملتا۔ میرے شعبے میں محفلِ میلاد بھی تھی۔ میری تین ہم جماعتوں تابندہ، اریبہ اور منیبہ کا اسٹال (Personality Test by Dr. Phills) برابر ہی میں لگا تھا۔ انہیں خیال رکھنے کا کہہ کر میں محفلِ میلاد میں چلا گیا کہ وہاں ایک نعت کے لیے نام لکھوایا ہوا تھا (اس کی موبائل سے بنی ہوئی ویڈیو مل سکی تو لگاؤں گا)۔ ان دوستوں نے واقعی کافی ساتھ دیا جس کی وجہ سے بے فکری رہی۔ وہاں سے ایک/ ڈیڑھ گھنٹے بعد واپس آیا تو ابو کام میں مصروف تھے۔۔۔ وہیں گھومتا پھرتا رہا۔ کافی سارے اسٹالز لگے تھے اور خوب ہلّا گلّا تھا۔ مختلف کھیل ہورہے تھے، مہندی لگ رہی تھی، گانے بج رہے تھے، عبایا اور چوڑیوں کی خرید و فروخت جاری تھی، اسکیچ کلب میں ایک نوجوان بیٹھا 15 منٹ اور 150 روپے کے بدلے لوگوں کے خاکے بنارہا تھا۔ دل تو بہت کیا کہ میں بھی بنواؤں مگر ڈیڑھ سو روپے نکالنے کی ہمت نہ ہوئی۔ جامعہ سے عنقریب شایع ہونےوالے میگزین ’’یوتھ ایکسپریس‘‘ کے اسٹال پر گیا تو وہاں اس کے ایڈیٹر ان۔چیف مرزا نادر بیگ سے پہلی ملاقات ہوئی۔ انہیں میں نے اپنی تحریر ’’انڈا‘‘ بھیجی تھی جس سے یہ خاصے متاثر لگتے ہیں۔

شام سوا چار بجے کے قریب جب رش چھٹنا شروع ہوا اور ہمارے پڑوسیوں نے اسٹال سمیٹا تو ہم نے بھی اپنی دکان بڑھائی اور چل دیے۔ اللہ تعالیٰ کا لاکھ لاکھ شکر ہے کہ لوگوں کا ردِّ عمل خاصا مثبت رہا اور خوشی خوشی گھر واپسی ہوئی۔

اس بار دیگر اسائنمنٹس میں صرف اُردو کا اسائنمنٹ ہی کچھ قابلِ ذکر بناسکا جس کا موضوع ’’مرزا فرحت اللہ بیگ کی خاکہ نگاری‘‘ تھا۔ یہ اسائنمنٹ آن لائن مطالعے کے لیے جلد پیش کروں گا ان شاء اللہ۔ عمرانیات اور تعلیم کے اسائنمنٹس بس بھرتی کے تھے۔ میں نے ان پر زیادہ کام نہیں کیا۔ ہاں، اب ’’سیاسیات‘‘ (Political Science) کا اسائنمنٹ ملا ہے جو ذیل کے تین موضوعات میں سے کسی ایک پر بنانا ہے:
1۔ کیا پاکستان ایک ناکام ریاست ہے؟
2۔ پاکستانی سیاست میں فوج کا کردار
3۔ بلیک واٹر۔ پاکستان کو دھمکی؟
آپ لوگ مشورہ تو دیں کہ کس موضوع پر بنایا جاے اور کیا کچھ مطالعے میں شامل کیا جاے۔

وقت گزرنے کے ساتھ ساتھ انسان کو تجربہ حاصل ہوتا ہے، اگر آنکھیں کھلی رکھی جائیں تو مشاہدہ وسیع تر ہوتا چلا جاتا ہے۔ جامعہ میں آنے کے بعد بہت کچھ ایسا جاننے، دیکھنے اور بھگتنے کو ملا جو پہلے کبھی سوچا نہیں تھا۔ کچھ لڑکیوں کی طرف سے پروپوزل بھی آگئے ایک سے میری بات چیت بہت محدود اور دوستی کی حد تک تھی، ان کی جانب سے بہت جلد پسندیدگی کا اظہار ہوا جس نے مجھے تھوڑا بوکھلا بھی دیا کیوں کہ مجھے ایسی کوئی توقع نہیں تھی۔ شروع میں تو میں نے انہیں یہ سمجھانے کی کوشش کی کہ میرے لیے آپ کے ساتھ رشتہ بالکل اس نوعیت کا نہیں۔ پھر میں نے اُن کو یہ سمجھایا کہ میرے حقوق پہلے سے محفوظ کرلیے گئے ہیں۔ اس کے باوجود وہ موصوفہ سمجھ نہ سکیں اور اب تک سمجھ نہیں پائیں۔ ان سے بارہا اس طرح کے مکالمے ہوے:
س: آپ چاہتی کیا ہو؟
ج: آپ کی مسز بننا۔
س: آپ کو پتا بھی ہے نا کہ میری منگنی ہوچکی ہے؟
ج: میں جو چاہتی ہوں، میں نے بتادیا۔
س: میں کیا کروں اس معاملے میں؟
ج: جو آپ چاہیں، وہ کریں!

اففف۔۔۔!! ایک واقعہ ہے، نجانے یہاں لکھنا مناسب ہوگا یا نہیں۔ میں نے ایک لڑکی کے پاس سے کتاب اُٹھائی۔ ضخیم تھی، اور اس کی ضخامت (یعنی موٹائی) پر قلم سے کچھ لکھا ہوا تھا جس طرح عموماً بچے لکھ دیتے ہیں۔ لڑکی کا نام ’’عظمیٰ‘‘ فرض کرلیں۔ اس کتاب پر لکھا تھا: ’’عظمیٰ پاگل کالی ہے‘‘۔ میں نے پوچھا، یہ کس نے لکھا؟ اُس نے فوراً میرے ہاتھ سے کتاب چھین لی۔ میں نے پھر پوچھا تو بولی، ’’یہ امّی ہیں نا بس۔۔۔‘‘ میں بے حد حیران ہوا، ’’یہ امی نے لکھا ہے؟‘‘ بولی، ’’ہاں، وہ بھانجا آیا ہوا تھا تو کتاب چھیڑ رہا تھا۔ میں نے اس سے بچانے کے لیے امی کو پکڑادی تو انہوں نے یہ لکھ دیا۔‘‘ مجھے حیرانگی کے ساتھ دُکھ بھی ہوا، پتا نہیں کیوں۔

’’سرکولیشن‘‘ سے اجرا شدہ کتب سے طلبا فائدہ تو اُٹھاتے ہی ہیں لیکن ان قیمتی کتب کے ساتھ جو سلوک کرتے ہیں، اس پر جتنا افسوس کیا جائے کم ہے۔ آج میرے ہاتھ ایک کتاب لگی جس کے ابتدائی صفحات پر لکھی تحاریر پڑھ کر اگرچہ ہنسنا آیا لیکن کتاب کی حالتِ زار اور طلبا کی ذہنی پستی پر شدید افسوس ہوا۔ میں آپ کو اس کتاب کے حال سے آگاہ کرتا ہوں۔

یہ ادریس صدیقی کی ایک ضخیم (غالباً ڈھائی سو سے زاید صفحات پر مشتمل) کتاب ہے۔ عنوان ہے: ’’اردو شاعری کا تنقیدی جائزہ‘‘۔ اس کے نیچے کسی نے قلم سے لکھا ہے: ’’ایسا جائزہ آیندہ ہرگز نہ کرنا ورنہ بہت ماروں گا۔ عبداللہ‘‘

اندرونی سرورق سے پہلے دو صفحات کسی زمانے میں خالی ہوا کرتے ہوں گے تاہم اب ان پر کافی کچھ تحریر کیا جاچکا ہے۔ کسی ہمدرد نے ایک پورا صفحہ پند و نصائح سے بھر ڈالا ہے کہ جامعہ میں امن سے رہیں، بڑوں کا ادب کریں، پڑھیں لکھیں، چھوٹوں پر شفقت کریں، وغیرہ وغیرہ۔۔۔ ایک صفحہ پر شروع میں کسی نے قلم سے شاید کوئی کتاب کا نام لکھ ڈالا: ’’اردو شاعری کا ارتقا۔ بشریٰ انصاری۔‘‘ ایک باذوق (یا بدذوق؟) نے بشریٰ انصاری کے قافیے ملائے تو وہ عبارت کچھ یوں ہوگئی: ’’اردو شاعری کا ارتقا۔ بشریٰ انصاری، میں تم پر واری، لے کر رنگا رنگ پروگرام کی سواری، آپ کی خدمت میں پہلی باری، بریانی کباب اور نہاری۔‘‘
حیراں ہوں دل کو روؤں کہ پیٹوں جگر کو میں

کتاب کے شروع میں کسی صاحب کا تبصرہ شاملِ اشاعت ہے۔ تبصرے میں کتاب کی خوبیاں اور تعریفیں بیان کی گئی ہیں۔ آخر میں آدھ صفحہ خالی رہ گیا تھا جس پر کوئی صاحب تبصرہ نگار بن کر یوں رقم طراز ہوئے:
’’اب میری اور ادریس (مصنفِ کتاب) کی لڑائی ہوگئی ہے لہٰذا میں اس کتاب کے بارے میں پھر ایک دفعہ کہنا چاہوں گا اور وہ یہ کہ یہ کتاب نہایت بودم ہے، بکواس ہے، طالبِ علم نہ پڑھیں تو بہتر ہے۔ شکریہ فقط۔ علاؤ الدین خالد‘‘

جو ابتدائی صفحات خالی تھے، وہاں ایک محترمہ نے پینسل سے یہ تحریر پیشِ خدمت کی جو کہ دراصل کتاب پر طلبا کے قلمی نقوش کے بارے میں ہے:
’’آج میں نے اس کتاب کی اُوٹ پٹانگ تحریروں کو پڑھا ہے اور مجھے بہت افسوس سے کہنا پڑتا ہے کہ لوگ اگر نصیحت بھی کرنا چاہتے ہیں تو بھی کتاب کا نیست ماردیتے ہیں (جیسا کہ آج میں بھی کررہی ہوں) پینسل سے اسی لیے کررہی ہوں کہ پڑھ کر مٹادیجیے گا۔
عزیز ساتھیو! یہ کتابیں ہمارا سرمایہ ہیں۔ کچھ عقل کے ناخن لیجیے اور اپنے سرمائے کی اپنے خزانے کی مانند حفاظت کیجیے تاکہ آیندہ نسلوں تک ہمارا سرمایہ کام آسکے۔
کتابوں کو کتابوں کی اصل ھالت میں دیکھنے کی مشتاق آپ کی ایک ساتھی
۲۸؍نومبر ۱۹۹۷ء‘‘

اس تحریر پر کسی نے یہ تبصرہ کیا ہے:
’’جی نہیں، ہمارا سرمایہ کتابیں نہیں۔ فخر و غرور سے ڈگری لینے کے بعد نوکری کس کو ملتی ہے۔‘‘

یہ تو ہوا کتاب پر رقم شدہ قلمی نقوش کا مختصر احوال۔ اب کتاب کی حالت سنیے۔ صفحات تو بوسیدہ ہو ہی چکے ہیں۔ ہمیں چاہیے تھا مرزا غالب کی شاعرانہ خصوصیات پر کچھ مواد۔ اب جو فہرست میں سے مرزا غالب کا باب دیکھ کر وہ صفحہ تلاش کرنا چاہا تو علم ہوا کہ صفحہ 140 سے 190 تک تمام صفحات غایب ہیں۔ شاید کسی ضرورت مند نے نکال لیے تھے۔ یہ امر بعید نہیں کہ اسی طرح اور بھی کتنے ہی صفحات کتاب میں سے غایب ہوتے۔ یہ موصوف کا احسان تھا کہ انہوں نے کتاب واپس کرنے کی زحمت گوارا کی۔ شاید انہیں اپنا لائبریری کارڈ عزیز تھا تاکہ وہ دوسری کتابوں کا بھی یہی حال کرسکیں۔

یہ اس ایک کتاب کا حال ہے جو میرے سامنے آج اتفاقاً آئی۔ ایسی کتنی ہی کتب اس وقت اس حالت کا شکار ہوں گی۔ یہ کس کی غلطی ہے؟ کہاں کمی ہے؟ جامعہ میں آنے والے طلبا کو کہتے ہیں کہ اب یہ واقعی بڑے ہوگئے ہیں۔ کیا یہ بڑوں والے کام ہیں؟ بلند و بالا باتیں کی جاتی ہیں، کبھی کتاب کی حرمت پر کوئی درس دیا جاتا ہے؟

دو بجے ٹیچر کے آفس میں میٹنگ رکھی گئی تھی لیکن مجھے دفتر پہنچنا تھا اس لیے میں نے معذرت کرلی. جانے سے پہلے ان طلبا کے نام دیے گئے تھے جو جشنِ آزادی کے فنکشن میں کچھ پیش کرنا چاہتے تھے. میری جماعت سے میں نے اپنا نام نغمے کے لیے دیا، ایک طالبہ کو تقریر کی ذمہ داری ملی (مگر وہ عین وقت پر بیمار پڑنے کے سبب نہ آسکیں). فائنل ایئر کی ایک طالبہ نے نظامت (کمپیئرنگ) کے فرائض انجام دینے تھے جس کا ابتدائیہ مجھ سے لکھوایا گیا. سال دوم کی ایک طالبہ نے جشنِ آزادی پر تقریر کرنی تھی، وہ تقریر بھی میں نے ہی لکھی.

13 اگست کو ہر شعبے نے اپنا اپنا فنکشن کرنا تھا. میں بڑے آرام سے صبح تیار ہوکر جب پونے نو بجے کے قریب اپنے شعبے سے پہنچا تو مجھے دفتر کے شاہد بھائی نے اشارہ کرکے بتایا کہ ٹیچر کلاس میں موجود ہیں… میری تو آنکھیں کھلی رہ گئیں… ٹیچر آج کلاس لینے کیسے آگئیں. خیر سانس بحال کرکے کمرہِ جماعت میں پہنچا تو صرف ایک طالبہ موجود تھی جس کے سامنے ٹیچر کچھ ارشاد فرمارہی تھیں. پتا یہ چلا کہ ہم تک پیغام پہنچنے میں غلطی ہوئی تھی، 10 بجے تک پڑھائی جاری رہنی تھی، اس کے بعد فنکشن تھا. خیر، ہماری جماعت کے تو سارے طلبہ و طالبات ہی غایب تھے.

ہمارا فنکشن سیمینار لائبریری میں ہونا تھا جو کہ باقی شعبوں کے مقابلے میں کافی دیر سے یعنی ساڑھے بارہ بجے کے بعد شروع ہوا اور تقریبا دو گھنٹے جاری رہا. میں گھر سے دو نغمے لکھ کر لے گیا تھا. ایک ’’اے وطن پیارے وطن‘‘ اور دوسرا ’’چاند میری زمیں پھول میرا وطن‘‘. ارادہ تھا کہ ’’اے وطن پیارے وطن‘‘ پڑھوں گا لیکن فنکشن شروع ہونے سے پہلے جب مائک اور اسپیکر نصب کیے جارہے تھے، تب ایک طالبہ نے یہ نغمہ پڑھ دیا. اگرچہ اس وقت فنکشن باقاعدہ شروع نہیں ہوا تھا لیکن میں نے یہ نغمہ پڑھنے کا ارادہ ملتوی کردیا اور جب مجھے بلایا گیا تو میں نے ’’چاند میری زمیں پھول میرا وطن‘‘ پیش کیا. داد توقع سے زیادہ ملی الحمدللہ. ہمارے شعبے کے آفس میں عظیم بھائی ہوتے ہیں، انہوں نے تو اپنی کرسی سے کھڑے ہوکر کندھا تھپتھپایا اور شاباش دی. بعد میں پتا چلا کہ سال دوم کے ایک بے چارے طالب علم نے بھی یہی نغمہ پیش کرنا تھا. جب اس کی باری آئی تو اس نے بھی یہی پڑھا.

افسوس کی بات یہ کہ جس طرح شعبے کو سجانے میں ہر جماعت سے چند طلبا پُرشوق نظر آئے، اسی طرح فنکشن میں بھی فائنل ایئر کی وہی چند لڑکیاں اور ہماری جماعت سے بس ہمارا ہی گروپ موجود تھا. باقی کسی کو جشنِ آزادی سے شاید دل چسپی نہیں تھی. تاہم جشنِ آزادی پر جامعہ کراچی میں جو سماں تھا، میں نے اس سے پہلے کبھی نہیں دیکھا تھا. عید کا منظر لگتا تھا، مجھے یہ سب دیکھ کر بے حد خوشی ہوئی.

شعبے کی لائبریری کو سجانے کے دوران غبارہ پھلاتے ہوئے

پاکستانی جھنڈا اوڑھے ہوئے

کچھ ہی ثانیے گزرے تھے کہ اچانک بھاگم دوڑی مچ اُٹھی۔ طلبا اِدھر سے اُدھر بھاگ رہے تھے۔ تب ہمیں احساس ہوا کہ خطرہ سر پر آن کھڑا ہوا ہے۔ سبق وہیں روک دیا گیا اور سارے بچتے بچاتے بھاگے۔ یہ پہلی بار تھا کہ جامعہ میں میری موجودگی کے بیچ ایسا ہنگامہ کھڑا ہوا ہو لہٰذا میں نے سوچا کہ بھاگنے سے پہلے ذرا منظرنامہ دیکھ لوں (یہاں منظرنامے سے مراد یہ والا منظرنامہ نہیں)۔ مجھے اس وقت وہ نصائح یاد آئے جو ہمیں بچپن سے کیے جاتے ہیں کہ ایسی کسی بھی حالت میں فوراً اس جگہ سے ہٹ جاؤ۔ میں نے سوچا، ہٹ جاؤں گا، ایسی بھی کیا جلدی ہے۔ راہ داری میں فسادی گروہوں کی آنکھ مچولی جاری تھی۔ پہلے ایک دیوار سے کوئی باہر جھانکتا اور پتھر کھینچ کر مارتا۔ اس کے بعد دوسری طرف سے ایک لڑکا کمرۂ جماعت سے باہر نکل کر کرسی مخالف کی طرف پھینکتا۔ جلد ہی میں اس یکسانیت سے بور ہوگیا لہٰذا فیصلہ کیا کہ اب چلنا چاہیے۔

راستے میں جابجا ایسے مناظر دیکھنے کو ملے۔ جہاں کچھ طلبا بھاگ نکلنا چاہ رہے تھے وہیں کچھ لڑکے، لڑکیاں بڑے مزے سے کھڑے ہوئے موبائل سے اس ساری صورتِ حال کی ویڈیو بنارہے تھے۔ شعبۂ سیاسیات پہنچا تو سر کامران خان (استاد، سیاسیات، جامعہ کراچی) نظر آگئے۔ پوچھنے لگے کہ کیا جارہے ہو؟ میں نے کہا کہ جی ہاں۔ کہنے لگے کہ چلو، پھر میں بھی ساتھ چلتا ہوں۔ مجھے اور کیا چاہیے تھا۔ اگرچہ سفر ہم نے بس ہی میں کرنا تھا لیکن اُن کے ساتھ سیاسی موضوعات پر گفتگو کرتے ہوئے سفر اچھا گزر جاتا ہے اور کافی کچھ سیکھنے کو بھی ملتا ہے۔

خیر، میں تو دفتر آگیا۔ بعد میں پتا چلا کہ وہ لڑائی جو جمعیت (اسلامی جمعیت طلبہ) اور آئی ایس او (امامیہ اسٹوڈنٹس آرگنائزیشن) کے درمیان شروع ہوئی تھی، بعد از آں اس میں پی ایس ایف (پیپلز اسٹٹوڈنٹس فیڈریشن) بھی آئی ایس او کی حمایت میں کود پڑی، ایڈمن بلڈنگ میں بھی کافی توڑ پھوڑ مچائی۔ میرا ایک ہم جماعت آئی ایس او میں ہے، سنا ہے کہ وہ بھی تھوڑا زخمی ہوا تھا۔ اس جھگڑے کی وجہ تو اللہ ہی جانے، کیا ہے۔ پرسوں شام بھی جمعیت اور آئی ایس او میں ہنگاما آرائی ہوئی تھی۔ سنا ہے کہ جامعہ پنجاب میں جمعیت کی کچھ پٹائی ہوئی ہے تو جمعیت کا احتجاج جاری تھا۔ اللہ جانے پرسوں کا جھگڑا اسی احتجاج کے دوران شروع ہوا یا کوئی اور وجہ تھی۔ لیکن بہ ہر حال، ہمارے ہاں کے بڑے تعلیمی اداروں میں یہ کوئی انوکھی بات نہیں۔ ایسے واقعات آئے روز ہوتے ہی رہتے ہیں۔ افسوس! طلبا تنظیموں کا مقصد یہ تو نہ تھا۔

میقاتِ اول (پہلے سمسٹر) کے امتحانات کے نتائج مناسب رہے، اگرچہ میری توقعات پر ایک عمرانیات (سوشیالوجی) کے نتیجے نے پانی پھیر دیا۔
اسلامیات: 78/100
مطالعہٴ پاکستان: 82/100
تعلیم: 75/100
سیاسیات: 88/100
عمرانیات: 63/100

کُل: 387/500۔ 77.4 فیصد

یعنی کہ 3.4 جی۔پی۔ میری خواہش تھی کہ 3.5 سے زیادہ ہو۔اگر سوشیالوجی نے غداری نہ کی ہوتی تو یقیناً کہیں بہتر نتیجہ ہوتا۔ بہرحال، اس بار پوری جماعت میں سب سے بہتر میرا ہی نتیجہ رہا ہے۔ اللہ تعالیٰ توفیق دے کہ آئندہ بھی اسے برقرار رکھ سکوں بلکہ اسے مزید بہتر بناؤں۔ آمین

اس میقات میں اسلامیات اور مطالعۂ پاکستان کے بجائے اردو اور انگریزی کے مضامین ہیں۔ امید ہے کہ اُردو پڑھنے میں لطف آئے گا۔ ہمیں شعبۂ اردو کی محترمہ ذکیہ صاحبہ اردو پڑھائیں گی۔ اس کے علاوہ جامعہ کراچی میں مرکزِ مطالعاتِ ایران شناسی قائم ہوا ہے جو جامعہ کے طلبا کے لیے فارسی اور ایران شناسی کی تدریس کا مفت اہتمام کررہا ہے۔ میں نے اس میں بھی داخلہ لیا ہے۔ جمعرات اور سنیچر کو ڈیڑھ/ ڈیڑھ گھنٹے کی تدریس ہوا کرے گی۔ دعاؤں میں یاد رکھنے کی درخواست ہے۔